ಪಶ್ಚಿಮ್ ಕರಾವಳಿಂತ್ ಆನಿ ವಿಶೇಸ್ ಕರ್‍ನ್ ಉಡುಪಿ ದಿಯೆಸೆಜಿಂತ್ ಆಮಾಲ್ ಆನಿ ಆಮಾಲ್ ವಸ್ತು ಪಿಡೆಸ್ತಾಂಚಿ ಚಿಕಿತ್ಸಾ ಆನಿ ಪುನರ್ವಸತಿ ಗರ್ಜ್ ಸಮ್ಜೊನ್, ತಾಂಚ್ಯೆ ಖಾತಿರ್ ಏಕ್ ಕೇಂದ್ರ್ ಸ್ಥಾಪನ್ ಕರ್‍ಚೊ ಕರ್ನಾಟಕ ಕಾಪುಚಿನ್ ಫ್ರಾದಿಂಚೊ ಇರಾದೊ ಆಸ್ಲೊ. ಬ್ರಹ್ಮಾವರ್ಚ್ಯಾ ಹೇರೂರಾಂತ್ ಕೃಷಿ ಕೇಂದ್ರಾ ಲಾಗ್ಸಾರ್ ಮಾನೆಸ್ತಿಣ್ ರೂಬಿ ಸಿಕ್ವೇರಾನ್ ಉದಾರ್ ಮನಾನ್ ಹೆ ಸೆವೆ ಖಾತಿರ್ ಸುವಾತ್ ಆನಿ ಏಕ್ ಘರ್ ದಿಲ್ಲೆಂ ಆಸ್ತಾಂ, 2018 ಫೆಬ್ರೆರ್ 27 ವೆರ್ ಕರ್ನಾಟಕ ಕಾಪುಚಿನಾಂಚೊ ವ್ಹಡಿಲ್ ಬಾ| ಡೊಲ್ಫಿ ಜೊಸೆಫ್ ಪಾಯ್ಸ್ ಹಾಣೆ ಹೆಂ ಕೇಂದ್ರ್ ಉಗ್ತಾವಣ್ ಕೆಲೆಂ. ಉಡುಪಿಚೊ ತವಳ್ಚೊ ಧರ್ಮಾಧ್ಯಕ್ಷ್ ಅ|ಮಾ| ದೊ| ಜೆರಾಲ್ಡ್ ಲೋಬೊನ್ ಆಶೀರ್ವಚನ್ ಕರ್‍ನ್ ಆಮಾಲ್ ಪಿಡೆಸ್ತಾಂಚ್ಯೆ ಚಿಕಿತ್ಸೆ ಖಾತಿರ್ ಲೋಕಾರ್ಪಣ್ ಕೆಲೆಂ.
ಭದ್ರಾವತಿ ಆಶಾಕಿರಣ ಪುನರ್ವಸ್ತೆ ಕೇಂದ್ರಾಂತ್ ಆಮಾಲ್ ಪಿಡೆಸ್ತ್ಯಾಂಚ್ಯೆ ಸೆವೆಂತ್ ಲಾಂಬ್ ವರ್ಸಾಂಚೊ ಅನ್ಭೊಗ್ ಆಸ್ಚೊ ಕಾಪುಚಿನ್ ಬಾ| ಚಾರ್ಲ್ಸ್ ಸಲ್ಡಾನ್ಹಾ ಹ್ಯಾ ಕೇಂದ್ರಾಚೊ ನಿರ್ದೇಶಕ್ ಜಾವ್ನ್ ನೇಮಕ್ ಜಾಲೊ.
ಪುನರ್ವಸ್ತೆ ಕೇಂದ್ರ್ ಸುರ್‍ವಾತ್ ಜಾಲಾಂ ಮಾತ್ರ್ ಆಸ್ತಾಂ, ಪ್ರಸ್ತುತ್ ಕೇಂದ್ರಾಂತ್ ಫಕತ್ ಸಮಾಲೋಚನಾಕ್ ಮಾತ್ರ್ ಅವ್ಕಾಸ್ ಆಸಾ. ಚಡಿತ್ ಚಿಕಿತ್ಸಾ ಗರ್ಜ್ ಆಸ್‌ಲ್ಲ್ಯಾಂಕ್, ಭದ್ರಾವತಿ ಆಶಾಕಿರಣ್ ಕೇಂದ್ರಾಕ್ ವಾ ಹೆರ್ ಚಿಕಿತ್ಸಾ ಕೇಂದ್ರಾಂಕ್ ಧಾಡ್ಚಿ ವ್ಯವಸ್ಥಾ ಆಸಾ. ಆರಂಬ್ ಜಾವ್ನ್ ಆಜ್ ಪರ್‍ಯಾಂತ್ ಕರ್ನಾಟಕ, ಗೊಂಯ್ ಆನಿ ಮಹಾರಾಷ್ಟ್ರಾಚ್ಯಾ ಜಾಯ್ತ್ಯಾ ಪಿಡೆಸ್ತಾಂನಿ ವಿವಿಧ್ ಸಮಸ್ಸ್ಯಾಂನಿ ಕೇಂದ್ರಾಚಿ ಭೆಟ್ ಕೆಲ್ಯಾ.
ಆಶಾಕಿರಣ ಕೇಂದ್ರಾನ್ ಪಾಟ್ಲ್ಯಾ ಸಬಾರ್ ವರ್‍ಸಾಂನಿ ಆಮಾಲ್ ಆನಿ ಮಾದಕ್ ವಸ್ತುಂಚ್ಯಾ ಅಪಾಯಾ ವಿರೋಧ್ ಜಾಗೃತಿ ಕಾರ್ಯಕ್ರಮಾಂ ವೆವೆಗ್ಳ್ಯಾ ಸುವಾತೆಂನಿ ಮಾಂಡುನ್ ಹಾಡ್ಲ್ಯಾಂತ್ ಆನಿ ಹಜಾರೊಂ ವಯ್ರ್ ಜಣಾಂನಿ ವಾಂಟೊ ಕಾಣ್ಘೆವ್ನ್ ಫಾಯ್ದೊ ಜೊಡ್ಲಾ.
-
Welcome to Holy Family Church, Brahmavara.