ಹೊ ಮೇಳ್ 'ಭುರ್ಗ್ಯಾಂನಿ ಭುರ್ಗ್ಯಾಂಚೆ ಕುಮ್ಕೆಕ್' ಮ್ಹಳ್ಳ್ಯಾ ಧ್ಯೇಯಾಖಾಲ್ 1843 ವ್ಯಾ ವರ್ಸಾ ಫ್ರಾನ್ಸಾಂತ್ ಭಿಸ್ಪ್ ಚಾರ್ಲ್ಸ್ ಜಾನ್ಸನಾನ್ ಆರಂಭ್ ಕೆಲ್ಲೊ. ಮಿಸಾಂವ್ ಗಾಂವಾಂನಿ ಆಸ್ಚ್ಯಾ ದುಬ್ಳ್ಯಾ ಭುರ್ಗ್ಯಾಂಕ್ ಕುಮಕ್ ಕರ್ಚೆ ಖಾತಿರ್ 'ಬಾಳೊಕ್ ಜೆಜುಚೊ ಮೇಳ್' ಮ್ಹಣ್ ಆರಂಭ್ ಜಾಲ್ಲೊ. ಹೊ ಮೇಳ್ ಆತಾಂ ಸಗ್ಳ್ಯಾ ಸಂಸಾರಾರ್ ವಿಸ್ತಾರ್ಲಾ. ಹ್ಯಾ ಮೆಳಾಚಾ ಭುರ್ಗ್ಯಾಂಚ್ಯಾ ತ್ಯಾಗಾ ಆನಿ ಸಾಕ್ರಿಫಿಸಾದ್ವಾರಿಂ ಎಕ್ಟಾಂಯ್ ಜಾಲ್ಲ್ಯಾ ಕಾಣಿಕೆ ನಿಮ್ತಿಂ ಸಂಸಾರಾಂತ್ಲ್ಯಾ ದುಬ್ಳ್ಯಾ ನಿರ್ಗತಿಕ್ ಭುರ್ಗ್ಯಾಂಕ್ ಪೋಷಣ್, ಶಿಕಪ್ ಆನಿ ಹೆರ್ ಸವ್ಲತಾಯೊ ಲಾಬ್ತಾತ್. ಉಡುಪಿ ದಿಯೆಸೆಜಿಚ್ಯಾ ಸಬಾರ್ ಫಿರ್ಗಜಾಂನಿ ಹ್ಯಾ ಮೆಳಾಚಿಂ ಘಟಕಾಂ ಸ್ಥಾಪನ್ ಜಾವ್ನ್, ಕ್ರಿಯಾತ್ಮಕ್ ರಿತಿನ್ ಚಲುನ್ ಆಸಾತ್. ತ್ಯಾ ಮುಕಾಂತ್ರ್ ಭುರ್ಗ್ಯಾಂ ಥಂಯ್ ಮಿಸಾಂವಾ ವಿಷ್ಯಾಂತ್ ಖರಿ ಹುಮೆದ್ ಚಡಂವ್ಕ್ ಸಾಧ್ಯ್ ಜಾಲಾಂ.
ಆಮ್ಚೆ ಫಿರ್ಗಜೆಂತ್ 2017 ಇಸ್ವೆಂತ್ ಜುಲೈಚಾ 9 ತಾರಿಕೆರ್ ಮಿಶ್ಯೊನರಿ ಭುರ್ಗ್ಯಾಂಚಾ ಮೆಳಾಚೊ ಘಟಕ್ ಸ್ಥಾಪಿತ್ ಜಾಲೊ. ಉಡುಪಿ ದಿಯೆಸೆಜಿಚೆ 'ಪರ್ಗಟ್ಣಿ ಆನಿ ಸುವಾರ್ತಾ ಪ್ರಸಾರ್’ ಆಯೋಗಾಚೆ ದಿರೆಕ್ತೊರ್ ಬಾಪ್ ವಿನ್ಸೆಂಟ್ ಕ್ರಾಸ್ತಾ ಹಾಜರ್ ಆಸೊನ್ ಮೆಳಾಚೆ ಸುರ್ವಾತೆಚಿ ಆನಿ ಕಾರ್ಯಾವಳಿಚಿ ಮಾಹೆತ್ ದಿಲಿ.
ಹರ್‍ಯೆಕಾ ಮಹಿನ್ಯಾಚಾ ಪಯ್ಲ್ಯಾ ಆಯ್ತಾರಾ ದುಸ್ರ್ಯಾ ಮಿಸಾ ಉಪ್ರಾಂತ್ ಚಲಂವ್ಚ್ಯಾ ಜಮಾತೆಕ್ ಪಾಂಚ್ವೆ ಕ್ಲಾಸಿ ಥಾವ್ನ್ ಧಾವಿ ಕ್ಲಾಸಿಚಿಂ ಭುರ್ಗಿಂ ಹಾಜರ್ ಜಾತಾತ್.
ಪಾಪ್ ಸಾಯ್ಬಾಚ್ಯಾ ಹಾತ್‌ಖಾಲ್ ಆಸ್ಚ್ಯಾ ಹ್ಯಾ ಮಿಶ್ಯೊನರಿ ಭುರ್ಗ್ಯಾಂಚ್ಯಾ ಮೆಳಾಚೆ ಸಾಂದೆ ಜಾವ್ನ್ ಆಮ್ಚಿ ಭುರ್ಗಿಂ ಹೆರಾಂಕ್ ಕುಮಕ್ ಕರ್ಚ್ಯಾ ಮಾಯಾಮೊಗಾಚಾ ಸ್ಪಿರಿತಾನ್ ವಾಡೊಂದಿತ್ ಆನಿ ಪವಿತ್ರ್ ಸಭೆಚ್ಯಾ ಮಿಸಾಂವ್ ವಾವ್ರಾಂತ್ ಆಪುಣ್‌ಯಿ ಭಾಗಿದಾರ್ ಮ್ಹಳ್ಳಿ ತೃಪ್ತಿ ತಾಂಕಾ ಲಾಭೊಂದಿ.
-
Welcome to Holy Family Church, Brahmavara.